مليش في الكورة وبتعجب من اهلي لما يتكلموا بحماس قوي عن الدوري المصري مثلا
انا اسمع ان الكورة دي اثارة كدا وتشويق
زي مثلا التريكو بالنسبة لنا يا معشر البنات أو زي غسل المواعين بالنسبة لي مثلا
فمنين بقا اثارة وتشويق وانا عارفة ان الاهلي مظبط دوري وكاس والزمالك حالتو وحشة
بيتهيألي ماتشات مرتضى منصور وأحمد شوبير بقت ألطف وأكثر إثارة وتشويق
مااااا علينا السبت الجاي المفروض ان مصر اللي هتلعب مع الجزائر وبعيدا عن اللي شايفين الحدوتة معركة
ولا معركة عين جالوت والاتوبيسات اللي حطت (بادج) -اي والله اتوبيسات النقل العام عندنا حطت بادج- عليه
عبارة "يارب مصر تكسب" انا واحدة بموت في تراب البلد دي وعلى رأي جاهين
بكرهها وألعن أبوها بعشق زي الداء
ونفسي نكسبببببب والللله بس مش بالعافية
يعني انت تكسب لما تلعب حلو مش لما تضرب لعيبة ولا تضايقهم في الفندق اللي هينامو فيه
متخيلة انا المنظر يوم السبت -وهابقى بشتغل فيه كالعادة- طبول الحرب هتدق حوالين الاستاد
وانا محشورة في اتوبيس تلاتين مثلا الساعة اربعة -يارب خيب ظني ياااارب
ممكن طيب اطلب من اللي رايحين الماتش يستنوا لما اروح بس ويشجعوا براحتهم وانا هاشجع معاهم حتى
اتمنى اليوم دا يعدي بسلام ونكسب بس نفسي حتى لما نكسب مش نفرح قوي
عشان الفرحة الكبيرة في مصر هتبقى يوم تعديل المادة 77 و76 يوم ما نوقف الفساد ونتخلص بقا
من جيل الديناصورات الزاحفة اللي طابق على نفسنا زي الاكلة المسبكة دا
اه صحيح انا كمان اتفق مع الاخ العزيز مدحت شلبي ان حفلة منير والشاب خالد مش هاينفع تتعمل قبل الماتش
هتبقى الاجواء مشحونة جدا
اضف إلى ذلك حقدي الدفين -ايوة الدفين- على كل اللي بيروحوا حفلات لمنير حبيبي
ناهيك عن ان الحفلة دي مع الشاب خالد حبيبي برضو
ملحوظة: عاجباني انا قوي بقا المبادرة بتاعت المصري اليوم اللي هيا وردة لكل لعيب جزائري قبل الماتش
بس يااااا خوفي يا بدران لا الجزائريين هما اللي لو خدوا الماتش -لا قدر الله- يدو كل لعيب مصري وردة
اتمنى لو فزنا منفرحش قوي ولو مفزناش نعرف اننا لعبنا وحش عشان كدا لا يمكن نكسب
وحتى في الدنيا اللي يلعب كويس يكسب
واللي لعبو وحش طب هايجيب اجوان منييين؟
سؤال بيطرح نفسو
البوست مش مترتب هيا طلبت معايا كدا
:)
No comments:
Post a Comment