مكنش قرار الرجوع لحاجة كنت بعملها قبل ديسمبر سهل.. مكنش سهل خالص
انا بمشي بالزق ودي حقيقة.. التشجيع والدفع والاحراج بقو هما الحاجات اللي بتخليني اعمل اي حاجة لاني ببساطة مش عايزة اعمل اي حاجة على الاطلاق.. حاسة ان حياتي وقفت او انها متستاهلش تكمل او انها "ماشية" ودي كلمة سخيفة للغاية بنوصف بيها الحياوات الرتيبة الحزينة
ما علينا
المهم اني راجعة.. مستغربة الدنيا جدا.. ولحد دلوقتي بصحى كل يوم على نفس السؤال.. هيا ماما راجعة النهاردة؟ طب هوا انا ينفع حياتي تمشي كدا عادي بعدها؟
قضيت شهور في سؤال هقدر ارجع ولا لا ولقيت نفسي بتحط على تراك اني ارجع.. معنديش مشكلة ادفع اي تمن.. مش خسرانة حاجة لكن كمان عايزة اؤكد اني مش هعمل حاجة ممكن تضايق ماما باي حال من الاحوال.. خلاص هيا راحت لمكان مفيهوش ضيق ولا حزن بس في حاجة تانية محيراني ولما كنت بسالها عليها زمان كانت بتقول لي "اللي يسمع كلام امه ميخسرش ابدا" وانا قررت اسمع كلام امي.. الله يرحمها بالمناسبة
