Wednesday, December 11
Monday, April 1
تخبط أم تصحيح مسار؟
وزي ما كان قرار رجوعي بعد غيبتي الطويلة عن الاذاعة بعد وفاة ماما قرار صعب كان قرار الاجازة الطويلة صعب كمان.. مش عارفة اللي انا فيه دا تخبط ولا تصحيح مسار.. لسه السفينة هايمة في البحور ولا رفعت شراعها لفوق وبوصلتها اتكلمت وشافت جزيرة ورايحة لها..
مش عايزة توهة اكتر من كدا.. حياتي بشكل عام بتتسم بالاستقرار والهدوء والركود كما اني شخصية لا اركن إلى التغيير الشامل المفاجئ ولكن القرارات من هذا النوع بتصيبني بالارتباك.. خاصة ان موضوع الاذاعة انا سعيت له كتير ووصلت له بمجهودي الخاص
القرار اتاخد خلاص بس بيفضل سؤال حاير.. يمكن الاقيله اجابة خلال التلت شهور دول.. يمكن الاقي معنى للعيشة ويمكن افضل عايشة كدا في استقرار وركود
انا في حالة من الاضطراب الداخلي الجواني العميق اللي بادئ من فترة طويلة وملاحظوش الا اقرب المقربين.. يا مسهل
Tuesday, January 8
ضجرت مني الحيطان
في النهاية وقبل وبعد كل حاجة
حزني دا ملكي أنا..بمعنى محدش حيقدر مشاعري قدي
وبالتالي بحاول اقلل جدا لومي للناس
متوقعش حاجة
كل اللي كنت محتاجاه النهاردة .. وهوا عيد ميلادي كان حضن
لما لمت اختي لانها محضنتنيش او باستني
قوبلت بعاصفة من التوبيخ والعياط
في رايي انا ملومتهاش على حاجة متستاهلش
انا لومتها على أهم حاجة بالنسبة لي وأنا مبلومش كتير
قررت اهدا شوية
لما اترصت قدامي مشكلات الفلوس والحياة وصعوبات البدء في حياة جديدة مع شخص كنت بحبه
غلطت نفس الغلطة .. انا مش محتاجة اكتر من حنية
أنا أصلا أصلا مش محتاجة أي حاجة من أي حد
اتقطع جوايا اي حب من أي نوع للشخص دا
مش لنفس السبب اللي بقالي سنين بسمعه
لكن عشان اكتشفت ان زيه زي اختي زي غيره كتير
محدش مدرك حاجتي الماسة لحضن
لقلب ولمشاعر
مش لهدية ولا لبوست على فيسبوك ولا شقة وشبكة و حاجات تانية كتير
أنا مش زعلانة من حد حقيقي.. يمكن اللي يضايق اني بفتكر ماما في اليوم دا دايما
بس مش هزعل لانها مش عايزاني أزعل
الحمد لله رب العالمين
اللهم ارحمها وارزقني الحنان
Subscribe to:
Posts (Atom)