المشهد من فيلم السلم والتعبان وفيه بيخلع هاني سلامة (حازم) من حلا شيحة (ياسمين) "بشياكة" لما لقاها محترمة.. حلا معجبتنيش قوي أما هاني سلامة فياخد جايزة الدولة التقديرية في البرود والاستفزاز بجد كان طبيعي موت في المشهد .. بشكل عام سيناريو المشهد عجبني
صوت جرس باب بيت حازم بيرن
ياسمين وهيا داخلة: ازيك؟
حازم وهوا بيفتح الباب: كويس .. خشي
بيقفل الباب
ياسمين بتحط الشنطة وبتروح على الثلاجة وتطلع بيبسي كان .. حازم بيروح يقعد على كرسي بعيد
وياسمين جاية ترمي غطا الكان بتشوف باسكيت الزبالة مليانة
بتقول لحازم وهيا رايحة ناحيته وهوا قاعد على الكرسي
ياسمين: انت كان عندك ضيوف امبارح؟
حازم: لا دي تحية بقالها يومين تلاتة مجتش
ياسمين: امم بما انك فاضي بقا ممكن تفهمني مبتردش على تليفوناتي ليه؟
حازم: ما قولتلك كنت نايم
ياسمين: مش مصدقاك
حازم: انا مش عايز اتكلم في الموضوع دا
ياسمين: لا هتتكلم.. عشان انا بقا عايزة افهم
حازم (بعد فترة صمت طويلة): ياسمين انا مش عايز أكمل (صمت) اتخنقت .. مش هقدر أبقى بطل الفيلم بتاعك .. مش عايز أتعبك معايا أكتر من كدا (صمت) صدقيني أنا حاولت بس حاسس ان انا بزق ف حيطة (صمت).. كدا أحسن
ياسمين(متماسكة): طبعا .. طبعا .. كفاية عليا كدا.. لحسن تفوتك حاجة أحسن مش كدا؟
(بترجع عشان تحط الكان في المطبخ وهيا مديالة ضهرها بتنزل دموع وبتمسحها.. بتجيب شنطتها من المطبخ وبترجع ناحيته)
ياسمين: على فكرة انت مبتفكرش غير ف نفسك.. انت عمرك حبتني؟ انت عمرك حبيت أي حد؟ (يبدأ صوتها بقا يبان ان فيه عياط) اللي مجنني ان الناس كلها كانت عارفة حقيقتك الا انا.. مصدقتهمش ودافعت عنك (بتلف عشان تمشي)
حازم (أخيرا بيقف على حيله): ياسمين.. أنا مضحكتش عليكي.. يمكن في الاول كنت كدا.. بس لو كملنا مع بعض مش هقدر أبقى مخلص وأنا مش عايز أعمل معاكي كدا.. مع ذلك انا عمري مع خنتك ولا حتى فكرت
ياسمين: لا برافو.. مكنتش أعرف انها تضحية كبيرة بالشكل دا.. (تنهيدة مع حبة عياط) على فكرة انت صعبان عليا قوي.. انت قعدت تجري ورايا شهور عشان توصل لحاجة واحدة بس مع ان كان عندك كل حاجة (الكاميرا بتيجي على وش حازم الخالي تماما من أي تعبيرات!!! وبرتجع لياسمين).. على فكرة انا مش ندمانة عشان الحب أجمل حاجة ف الدنيا وانا حبيتك بجد واستمتعت بكل لحظة حب فيها.. انا كنت حاسة اني طايرة وكنت فرحانة و.. انت كنت كل حاجة ف حياتي.. (بيتيجي الكاميرا تاني على حازم وشوية تعبيرات أسى بتبان بس برضو سكوت وبرود) بس عشان تبقى فاهم بقا انا هخرج من هنا وهقدر الاقي حد أحبه واديله كل حبي وحيقدرني بس انت قدامك سكة من اتنين يا هاتموت لوحدك يا هاتعيش مع واحدة مش طايق تبص ف خلقتها. بس اللي انا متأكدة منه بقا انك عمرك عمرك ما هتعرف الاحساس اللي انا عشته
(ياسمين بتتشحتف وبترزع الباب وراها وهيا خارجة.. حازم بيقعد على الكرسي وبيغطي وشه بايديه)
No comments:
Post a Comment