الاسم .. صابر
التهمه .. مصري
السن .. أجهل سن عصري
رغم انسدال الشيب ضفاير ضفاير
من شوشتى لما لتحت خصري
المهنة .. المهنة وارث عن جدودي والزمان
صنع الحضاره والنضاره والامان
البشره ... قمحى
القد .. رمحى
الشعر .. اخشن م الدريس
لون العيون .. اسود غطيس
الانف .. نافر كالحصان
الفم .. ثابت فى المكان
واما جيت ازحزحه عن مطرحه
كان اللى كان
جهة الميلاد.. فى أي أوضه مضلمه
تحت السما على ارض مصر
من أي دار وسط النخيل
مطرح ما يجري النيل
ما دام ما يكونش قصر
الحكم.. الحكم من سبع تلاف سنة
وانا راقد سجين
اطحن على ضراسي الحجر
من الضجر وابات حزين
سألنى سائل .. حبستك طالت وليه
لانى طيب .. وابن نكته .. وابن ايه
مفيش مخالفه ركبتها ضد القانون
لانى خايف والقانون سيفه ف ايديه
تسأل عليّ المخبرين فى أي حين
تسمع وتفهم قصتي ألف وبيه
الاسم صابر ع البلا أيوب حمار
شيل الحمول من قسمتى والانتظار
أغرق فى أنهار العرق طول النهار
وألم همى فى المسا وأرقد عليه
عرفت ليه؟
No comments:
Post a Comment