القصيدة لأحمد حداد .. صورها عدد من الفنانين منهم الفنان المبدع آسر ياسين اللي بيقول ليسرا اللوزي (بنت المحظوظة) قلتلها بحبك في الميدان فبتقوله وانا كمان
على العموم في التصوير كمان في جزء غناه مغنواتي فكرني بامام شوية واسمه حازم شاهين من اسكندريلا
هوا انتي عمرك كام سنة
وانا
عمري كام.. ضهري انحنى
وحسبت عمري ألف عام نمت في ضل الستاير
ولما طل يناير
من تاني اتولدت
ووجدت محبوبتي المسنة
بنوتة أبرأ من بياض السنة
بنوتة .. تسمع م السما حدوتة
كان يا مكان في الميدان
عمال وطلبة ودكاترة وفلاحين وكام جندي وكام فنان
مليون بنت وولد .. كل البلد في الميدان
كل البلد سهرانة قلقانة خايفة من غموض بكرة
ايديها على قلبها وعنيها ع الأكرة
من القلق كل الحياة بتعطل .. كل القهاوي تفور
يا حشرجة في الزور..ايه بقا القصة.. جه ولا لسه
لسه مجاش.. نزل المظاهرة الصبح.. والليل أتى بالقبح
وبصرخة الخفاش.. وهوا لسه مجاش
نزل في يوم جمعة مع ناس ميعرفهومش
مشي وراهم أو ورا احساسه
لقى البيوت مبتسمة. والشعب اهله وناسه
لقى البيوت مبتسمة بتقولو اوعى تخاف.. لقى الملايكة خفاف في قلوب المصريين
بيهتفوا يهتف يتجمعوا يطمن مع إن المكان المتأمن بقنابل مسيلة للدموع
ومع أول لسعة زور.. ومفيش دكتور
وفي نفس الوقت القنبلة التانية في السما محدوفة
كان حيموت.. بس الأمل صحاه ونفخ في عينيه المطروفة
..الأمل. الأمل هوا المصريين في المظاهرة
كام ألف زهرة بتتسقي بريحة الوطن
قال الشاطر حسن في ميدان الجلاء ساعة الاختناق
القنابل مسيلة.. لكن قلوبنا جميلة
اتفرقوا ساعة الرصاص الحي.. أو زي بلي بينتشر في الحي
تاهت منهم
قررت ترجع لبيتها مشي.. اصحابها مش عارفين يوصلو التحرير
وهيا راجعة في اتجاه سينما التحرير
غضبانة وعطشانة.. وطول السكة في بالها حاجة واحدة
طب دلوقتي مفيش تاكسيات ولا تليفونات
يا هل ترى ايه العمل لو؟
قاطعها واحد ظهر في سكتها رعبها
ومن غير ما يفتح بقه اديها في ايديها علم مصر وابتسم ومشي
رجعت لها ضحكتها
الليل دخل
والرعب قدام الشاشة الخادعة البكاشة
واللي بيعلق على اللي بيموتوا كأنه من كوكب بلوتو
قولة آه بتعلمنا قولة لأ
والشعب طول عمره الأحق.. وانتو اللي غلط
بعنفه هوا الأرق
وكلامكم المعسول زلط.. قال المذيع
الدنيا ربيع.. كله زي الفل.. كله مية مية
يمكن اعمال شغب.. يجوز قلة أدب.. أو يمكن حرامية ومتزهش شنب
شنب الحكومة تقيل.. والجو بديع وجميل
مفيش أبدا خطر.. دي مؤامرة من قطر
الرعب قدام الشاشة وفي الشوارع دمار ودم ونار
القابضة حايشة كلام ونشرة الأخبار
والأم مش سامعة غير الجرس
على خدها الدمعة.. خرج نهار جمعة ولسه مجاش. .بتقول يارب بصوت مكتوم
معلوم
الليل بيزوم
بس النهار جنة لشعب مش مهزوم.. لشعب مش منكسر
تعرف تغني منتصر .. تعرف تعيش منتصر.. تعرف تموت منتصر
خرج شبابنا منفجر نهار جمعة ولسه مجاش
في ايه يا عم؟
اهدى
الشوارع غرقت دم
مهما تحرقني مهما ترميلي قنابل أو مولوتوف
برضه ريحتك خوف
يا جبان
يا مخربين يا قلة يا مندسة
بلقى في عذابكم لذة
نام يا وطن
واتمسى دا الليل بيفتح صقور
اتلهي .. النور صحي
واحنا تلاتة مليون.. بنغني في التحرير
واذا كنت رافض التغيير.. بالعند فيك الدنيا بتتغير
وان كنت مصر تبقى صغير. الثورة قامت في الميدان
قلتلها بحبك في الميدان قالتلي
وانا كمان
كل البلد في الميدان دي جمهورية جديدة تعظم الانسان
بيسهروا وبيغنوا
بيحلموا ببكرة
وبيدافعوا عن بعض
الثورة خلت الانسانية تزور الارض
انا شفتها بعينيا
كل الناس ايد واحدة
تمانين مليون وردة
الثورة رضيعتنا
ومصر هيا الوالدة
دكتور المستشفى الميداني لما تعبت.. شفاني
الثورة مخلتش حد اناني
وخلت كل الناس ايد واحدة
كل الناس ايد واحدة
ايدين شباب اقباط
كوردون حوالين المسلمين ساعة الصلاة
وشيوخ الازهر بيحضرو القداس
والشمس تظهر والنور ملا الميدان
ادان.. ترانيم
مكنتش عمري اتخيل ان الحياة مش غابة
وان احنا مش مساكين وغلابة
ان احنا بجد زي الاغاني والحواديت وكتب التاريخ ما قالت
ولا عمري كنت اتخيل نفسي في اشارة مع دبابة
ساعات بقول مش فاهمة وساعات بقول بكرة احلى
وببتسم بهدوء
وساعات بقول زي ما بيقولو
ارفع راسك فوق انت مصري
فوق فوق بص لفوق
انت مصري
نادي يا مصري بشوق
انت مصري
انت مكان وغيطان
وانت لقا واحضان
وانت مية وضوء
انت مصري
هوا مصري
ابني اللي اختفى من نهار الجمعة
دلوقتي بس عرفت هوا فين
هوا في الجنة
استنى
فاضل على الجنة سبع سماوات
مش برضه فاضل غنوة تتغنى
لسه الربيع يا رضيع مبتداش
مش كنت مستني جمال ورده
مش عيد ميلادك بكرة او بعده
مش برضه كنت تطل على ماما
يحمي شبابك للملايكة البيض
يا قلب اخضر جديد
بتضحك رغم موتك
انا سامعة صوتك من السماوات
الامهات والشهدا يتواصلو في صلاة الفجر
في أمنيات راس السنة أو في ليلة القدر
في فرحة الطفل بهدومه الجديدة
في قصيدة على الوطن اللي عمره ما مات
مش ناوي تبعت يا شهيد سلامات
الشهدا طايرين في السحاب وفي قلبهم أغنية
وفي وشهم بصة شباب
وريحة الحرية
والعيد بيتجدد مع ابتسامة الشهيد من الجنة
مع بصته لينا ودعواتنا ليه
الشمس طلعت ونورت بنور زيادة عن اللزوم
وحكت حكاية 18 يوم نضال
من المسيرة البيضا لهجوم الجمال
امبارح عدا بس سايب اثاره
وبكرة لسه في انتظاره
و11 - 2 - 11
تاريخ عمره ما هيتنسي
تاريخ مسجل فرحة وانسانية وعند وغضب وخوف وسياسة وخيم ومسارح وكلام عن امبارح
ودم
وكلام اكتر عن بكرة
عشان اللي جي
أهم
No comments:
Post a Comment